前陣子多了嘗試影硬照，想起一件小事：
十七年前，嗰個暑假非常鬱悶，會考剛完，23條將至，香港由疫區名單除名。未使放榜都知升中六係凍過水，對未來感到無望，世事與我何干。有日頂唔順頭髮大半年都無剪過，落左新城市廣場西田飛髮，兩舊水，豪一豪佢。其實覺得好貴，嗰陣返暑期工一個鐘先得廿幾蚊。
剪完，髮型師幫我將個頭蠟到精神爽利，個人都當堂企直左。其實蠟到個頭咁靚都係運吉，反正我都係返屋企繼續毒，習慣入屋後會即刻沖涼洗頭。
行緊去撘車嗰陣，有人拍拍我膊頭，話係model 公司星探，「你對腳咁長，比例幾好，有無興趣試下？」。佢抄左我牌，我收左佢張卡片。「遲啲打俾你，約上黎度身試鏡」佢話。作為一個滿面油光嘅痘痘仔，平時都無乜自信，但佢講到咁，又姑且聽住先。就咁，我地喺音樂噴泉下話別。個噴泉喺幾個月後，開始圍板清拆。
返到屋企，話左俾阿爸阿媽聽呢單野，順利嘅話，就唔使再做$20/hr。佢地嘰一聲笑左出黎，然後幫我個新髮型影左張相（圖5），以後自己可以望住張相剪返/蠟返呢個頭，至於試鏡黎講呢，就叫我小心誤墮騙案。
都真，當年Model公司騙案多如雨後春筍、成日見報，生意好過賣珍珠奶茶。後來另一壇，差啲俾小學同學說左去做傳銷賣香薰，都幸得佢地制止我。
但 Model呢單野，都係心思思，當時心諗：我都就黎18歲，步入成年，係時候闖一番事業。抱住良好意願，嗰個月成日留意電話有無 miss call，最後，星探先生都係無打黎。作為高登 CD-ROM，點會唔明當年流行嘅一句諺語，「這些機會」，心裡有底，發夢無咁早。
後來會考放榜，得10分，如果想，都可以強行去band 5 升中六，事實上馬鞍山習武聖地董芝英都收左我，interview嗰日仲撞到林裘謀小食部個薇姨，估唔到佢都轉左校，仲請左包麥精我飲。嗰次就係我地最後一次見面。btw，最後我都係的起心肝自修 repeat 算數，砍掉重練。
我諗當時嘅我點都估唔到，三十幾歲先黎成就解鎖
呢幾個月幸得攝影師、Stylist、妝頭同工們嘅照顧，幫我執返啲手手腳腳眼耳口鼻
我代表17歲半嘅盧鎮業多謝各位
好啦，呢個故事叫臨老做Model
勵志說不上，都係得啖笑，唔唔
☁️
Search